प्रातिनिधि : पिंपरी चिंचवड शहरातील गोरगरीब नागरिकांसाठी जीवनदायिनी म्हणून ओळख असणाऱ्या यशवंतराव चव्हाण स्मृती रुग्णालयामध्ये सुरु असलेल्या अनागोंदी कारभारामुळे नागरिक त्रस्त झाले आहेत. यशवंतराव चव्हाण स्मृती रुग्णालयामधील अनागोंदी कारभाराचा परिणाम थेट रुग्णसेवेवर होत असल्याने प्रशासनाच्या वतीने कठोर उपाययोजना त्वरित अमलात आणावी असे निवेदन माजी नगरसेवक संदीप वाघेरे यांनी आयुक्त शेखर सिंह यांना दिले.
आयुक्तांना दिलेल्या निवेदनात वाघेरे म्हणाले कि, यशवंतराव चव्हाण स्मृती रुग्णालय बऱ्याच दिवसांपासून विविध कारणानी चर्चेत राहत असल्याचे निदर्शनास आले आहे. हि बाब पिंपरी चिंचवड महानगरपालिकेच्या प्रतिमेस काळीमा लावणारी आहे. यशवंतराव चव्हाण स्मृती रुग्णालयात सद्यस्थितीला तातडीक विभागामध्ये बेडची संख्या अपुरी असल्याने रुग्ण दाखल करून न घेता पुण्यातील ससून रुग्णालयाकडे रेफर केले जात असल्याचे निदर्शनास आले आहे तसेच मायनर ओटीची सुविधा असताना देखील रुग्णांना कित्येक तास अम्बुलंसमध्ये प्रतीक्षा करावी लागत आहे. तातडीक विभागात दाखल होणाऱ्या कित्येक अपघाती तसेच अपंग रुग्णांना व्हील चेअर,स्ट्रेचर उपलब्ध होत नाही त्यामुळे रुग्णांचे मोठ्या प्रमाणावर हाल होत असल्याचे दिसून येते. शिकाऊ डॉक्टर काम पाहत असून सिनिअर प्रोफेसर व डॉक्टर हे रुग्णालयाच्या २ ऱ्या मजल्यावरती बसून कामकाजाकडे अक्षम्य दुर्लक्ष करत असून रुग्णांच्या उपचाराकडे पाठ फिरवली आहे. तातडिक विभाग सक्षमपणे कार्यरथ करणेसाठी तज्ञ डॉक्टर तसेच अनुभवी परिचारिका पूर्ण वेळ उपस्थित राहणे अनिवार्य असताना देखील तज्ञ डॉक्टर विभागात उपस्थित राहत नाहीत तसेच अतिदक्षता विभागात ट्रेनिंग नसलेल्या डॉक्टरांना उपचार देणेस भाग पाडतात व विशेष तज्ञ डॉक्टर रुग्णांकडे कानाडोळा करताना दिसून येतात. यशवंतराव चव्हाण स्मृती रुग्णालयाच्या जुन्या डॉक्टरांकडे अन्य विभागाचे पदभार दिले असल्याने यामुळे रुग्नसेवेच्या धोरणांची अंमलबजावणी होताना दिसून येत नाही.रुग्णसेवेसाठी लागणारी उपकरणे देखील बंद स्थितीत आहेत. रुग्णालयातील एकस रे मशीनची बॅटरी चार्ज होत नसल्याने वारंवार नवीन जिजामाता रुग्णालयामध्ये पाठविण्यात येत आहेत.तसेच रुग्णांना एकस रेच्या प्रिंट देखील उपलब्ध होत नाहीत.ड्रोपलर मशीन मागील दोन वर्षांपासून बंद स्थितीत आहेत. गरोदर महिलांच्या USG मशीन देखील नादुरुस्त स्थितीत असतात.लहान व नवजात बालकांसाठी NICU देखील उपलब्ध होत नाही रुग्णालयात ३० प्रसूती खाटासाठीचा असलेल्या विभागामध्ये आता फक्त १५ खाटा शिल्लक आहेत ऑपरेशन थिएटर मधील सक्शन मशीन बंद स्थितीत आहे तसेच अनेस्थेशिया मशीन नादुरुस्त स्थितीमध्ये आहे मशीन वॉरंटी मध्ये असल्याने दुरुस्तीसाठी वेळ लागत असल्याने न्युरोसर्जरी साठी ऑपरेशन थियटर उपलब्ध होत नाही.त्यामुळे रुग्णांना उपचारासाठी तीन तीन महिने उशिराची तारीख मिळत आहेत तर तातडीच्या रुग्णांना काही डॉक्टरांच्या संबधातील खाजगी रुग्णालयामध्ये जाण्याचा सल्ला रुग्णालयातील अधिकाऱ्यांमार्फत देण्यात येत आहे.रुग्णालयामध्ये अस्थिरोग तज्ञ खाजगी प्रक्टिस करीत असल्याने फक्त १ तास ओ पी डी चालविताना दिसून येत आहे. यामुळे अस्थिरोग रुग्णांना ओटी साठी तीन महिने उशिराची वेळ दिली जात आहे तसेच रुग्णांना उपचारासाठी लागणारे इन्प्लांट हे डॉक्टरांच्या मर्जीतील व्यक्तीकडून घेण्याची शिफारस केली जात असल्याचे दिसून येते.बरेचश्या हाडांचे ऑपरेशन महात्मा फुले जनआरोग्य योजने अंतर्गत होत असताना देखील रुग्णांना इंप्लांट बाहेरून आणण्यासाठी प्रवृत्त केले जात आहे.
या सर्व बाबींचा गांभीर्याने विचार करून दोषींवर कठोर कारवाई होणे गरजेचे झालेले असून आपण तपासणी पथक व वरिष्ठ अधिकाऱ्यांमार्फत यशवंतराव चव्हाण स्मृती रुग्णालयामध्ये शहानिशा करून दोषी अधिकारी व कर्मचारी यांचेवर कारवाई करण्याचे निर्देश द्यावेत. अशी आग्रही मागणी वाघेरे यांनी आयुकांकडे केली आहे.
